Ancajas modepensa na sa iyang bakus
CEBU, Philippines — Taas ang kompiyansa sa Pinoy’ng boksidor nga si Jerwin ‘Pretty Boy’ Ancajas sa iyang pagpanalipod sa iyang trono isip IBF super flyweight champion batok ni Jaime ‘The Mexican’ Conlan karong adlawa didto sa The SSE Arena Belfast, Northern Ireland.
Mao kini ang ikatulong pagdepensa ni Ancajas sa titulo nga iyang nasakmit human gipilde ang Puerto Rican nga si McJoe Arroyo pinaagi sa unanimous decision niadtong Septiyembre sa miaging tuig.
Pareho niyang gipatikangkang sila si Jose Alfredo Rodriguez sa Mexico ug Teiru Kinoshita sa nag-una niyang duha ka depensa.
Masaligon man tuod sa iyang tsansa, apan angayan nga magmatngon si Ancajas gumikan kay gawas nga moaway sa balwarte sa iyang kontra, dekalibre sab ang iyang kontrang si Conlan nga daghan ang nag-idolo didto sa Britanya.
Si Ancajas kausa pa lamang mapilde sa 29 ka away nga gidayan-dayanan og 18KOs, apan mas kuyaw si Conlan kay wala pa’y pilde sa 19 ka sangka diin 11 sa iyang mga biktima pinaagi sa knockout. (BANAT NEWS)
- Latest
