Samsam Gullas Cup dunay misyon sa Cebu basketball

CEBU, Philippines — Ang ikaduhang edisyon sa Samsam Gullas Cup Inter-Cities and Municipalities Under-20 Developmental Basketball Tournament mosikad na karong Sabado didto sa Minglanilla Sports Complex uban ang usa ka dalaygon nga katuyoan.

Kini mao ang pagsigpat og mga talento ug dayong hulmahon  aron mamahimong mga bitoon sa Cebu basketball sa umaabot.

Mao kini ang nag-unang mga hinungdan nganong usa lamang ka kategoriya ang kumbatihan ug ingon man dili mahimong makaapil ang mga varsity players ning tulo ka semana nga torneyo nga salmotan sa mga batan-ong basketbolista gikan sa unang distrito sa Sugbo.

Atol sa press conference niadtong Miyerkules sa hapon, si Cebu First District Rep. Gerald Anthony ‘Samsam’ Gullas Jr. nagkanayon nga tinguha gyud nila ang makapangita og  mga linghod nga talento ug dayon bairon ang ilang abilidad nga lagmit maoy mahimo niyang yawi alang sa maayong kaugmaon.

“Our main purpose is to find raw talents that we could train with hopes of opening the door for them to brighter opportunities like getting free education out of their being a basketball player,” matud pa ni Gullas.     

Sukad kini gitukod sa iyang apohan, ang kasamtangang mayor sa Talisay City nga si Eduardo ‘Eddiegul’ R. Gullas niadto pang dekada '70, ang Gullas Cup naghulma na og mga banggiitang magduduwa sa amateur ug ingon man sa pro.

Giisip ni konsehal Rodi Cabigas si Roger Pogoy, ang kasaligan nga wingman sa TNT KaTropa nga maoy gibayaw  nga  “Rookie of the Year” sa bag-o lang natapos nga 42nd PBA season, isip usa sa labing tam-is nga bunga sa Gullas Cup.

Karong tuiga, dili momenus walo ka players gikan sa Unang Distrito sa Sugbo nga mihimo og impresyon sa 1st Cebu Governor’s Cup.

Kini naglakip nilang Jan Mangaron ug Marc Glenn Nebril sa Minglanilla ug Jake Engbino, Jiesel Tarrosa, Windzel Granada, Vyron Villanel, Jhiey Paraldo, ug Denzel Sabroso sa Talisay City.

Sila si Mangaron ug Nebril sakop karon sa University of San Jose-Recoletos (USJ-R) Jaguars, si Engbino gikuha sa Adamson University, sila si Tarrosa, Paraldo ug Sabroso gibira sa University  of   the  Visayas (UV) Lancers, samtang sila si Villanel    ug   Granada   napunta sa Cebu Institute of Technology-University (CIT-U) Wildkittens.

Matud pa ni Gullas nga mao kini ang gidamgo nilang makab-ot gikan sa ilang programa. (BANAT NEWS)