Ancajas mokubra'g P4.1M sa ikatulong depensa

CEBU, Philippines — Bulahan kaayo ang Pinoy’ng boksidor nga si Jerwin ‘Pretty Boy’ Ancajas sa umaabot niyang pagdepensa sa iyang trono.

Kini gumikan kay si Ancajas garantisado nga mokita og $80,000 kon P4.1 million sa ikatulo niyang pagpanalipod sa iyang IBF super flyweight title batok sa wa’y pildeng Briton nga si Jaime ‘The Mexican’ Conlan karong  Domingo didto sa The SSE Arena sa Belfast, United Kingdom.

Daw sa usa ka dakong bahandi ang nakaplagan ni Ancajas nga nakadawat lamang og $3,000 (P150,000) sa dihang iyang gihagit ang kanhi kampiyong si McJoe Arroyo sa Puerto Rico niadtong Septiyembre 3 sa  miaging tuig.

Si Ancajas impresibong mipilde ni Arroyo pinaagi sa unanimous decision. Sa una niyang depensa, iyang gipasurender si Jose Alfredo Rodriguez sa ikawalong hugna niadtong Enero 29 didto sa Cotain Arena sa Venetian  Macau.

Si Ancajas nagpabiling kampiyon human gipatikangkang sa ikapitong hugna ang iyang Japanese challenger nga si Teiru Kinoshita niadtong  Hulyo 2 didto sa Suncorp Stadium sa Brisbane, Australia. Si Ancajas nagbitbit og 27-1-1 record uban ang 18KOs, samtang si Conlan nagkupot og 19-0 nga baraha diin 11 sa iyang mga biktima iyang gipalukapa. (BANAT NEWS)