Ancajas, Gaballo nanulong na
CEBU, Philippines — Sila si IBF junior bantamweight champion Jerwin ‘Pretty Boy’ Ancajas ug ang wa’y pildeng boksidor sa Sanman Promotions nga si Reymart ‘GenSan Assassin’ Gaballo naabot na sa langyaw’ng teritoryo aron makigharong sa tagsa-tagsa nila ka mga kontra.
Si Ancajas mitaak na sa Belfast, Northern Ireland alang sa ikatulo niyang pagdepensa sa iyang titulo batok ni Jaime Conlan karong Domingo.
Si Ancajas relaks kaayo ug masaligon nga mapanalipdan niya ang iyang trono bisan pa og moaway siya sa nataran sa iyang kaatbang.
Katapusang nakadepensa sa iyang korona si Ancajas niadtong Hulyo 2 didto sa Brisbane, Australia human iyang gipakamang sa ikapitong hugna ang Japanese challenger niyang si Teiru Kinoshita. Sa una niyang depensa, iyang gipatikangkang sa ikawalong hugna ang Mehikanong si Jose Alfredo Rodriguez niadtong Enero 28 didto sa Macau.
Sa iyang bahin, si Gaballo mitugdon na sa Honolulu, Hawaii alang sa labing una niyang away didto sa Amerika.
Sangkaon ni Gaballo ang Mehikanong si Ernesto ‘Monito’ Guerrero sa main event sa “Fight Night at the Island” nga gipasiugdahan sa Pinoy’ng international boxing promoter nga si Gabriel ‘Bebot’ Elorde karong Huwebes didto sa Hawaii Events Center sa Honolulu.
Ang 21-anyos nga si Gaballo nagbitbit og 16-0 record ug 14 sa iyang mga biktima iyang gipakamang. (BANAT NEWS)
- Latest
