Banat ( Leaderboard Top ), pagematch: 1, sectionmatch: 1

Celtics nakaipsot

CEBU, Philippines — Bisan og wala si Kyrie Irving, wala gihapon mihupas ang kainit sa Boston Celtics ug nakaeskapo uban ang 95-94 nga kadaogan batok sa Toronto Raptors alang sa ika-12 nilang sunod-sunod nga daog sa NBA kagahapon didto sa Boston Garden sa Massachusetts.

Si Al Horford maoy nahimong bida sa Celtics nga mikadlit og 21 puntos sa iyang pagbalik human makapalta og duha ka duwa gumikan  sa bun-og sa iyang lawas. 

Tayming kaayo ang paghiabot ni Horford gumikan kay dili pa man makapakita’g aksiyon si Irving human mabuak ang nawong sa dihang aksidenteng naigo sa iyang kauban atol sa ilang duwa batok sa Charlotte Hornets niadtong Sabado.

Si Horford maoy nangulo sa lima ka Celtics nga naka-double figures. Si Jaylen Brown mihipos og 18 puntos, si Terry Rozier mitali og 16 puntos, samtang sila si Marcus Smart ug Jayson Tatum nagkumboya’g 27 puntos alang sa Boston nga wala na makatilaw pa og pilde human mahagba sa nag-una nilang duha ka duwa.

“It’s unbelievable... we are playing good teams too,” matud pa ni Rozier kabahin sa ilang pagratsada. 

Batok sa Raptors, nakamaneho sila pagposte og kulbahinam nga daog bisan og wala sila makapuntos sa katapusang 86 segundos.

“The good news is thus far that’s the only point of pain in his face or head or neck or anything else,” matud ni Celtics coach Brad Stevens.

Si Demar DeRozan mitali og 24 puntos, samtang si Kyle Lowry mipupo og 19 puntos alang sa Raptors nga natagak ngadto sa 7-5.

Sa uban pang mga duwa, si James Harden mipabuhagay og 26 puntos uban ang season-high 15 assists aron pangulohan ang Houston Rockets ngadto sa 118-95 nga demolisyon sa Indiana Pacers.

Si Eric Gordon mitampo og 21 puntos ug si Clint Capela midugang og 20 puntos ug 17 ka rebounds alang sa Rockets nga naglabaw gikan sa sinugdanan aron pagrehistro sa ikaunom nilang sunod-sunod nga daog.

Didto sa Detroit, si Tobias Harris mitimbre og 25 puntos aron aswaton ang Pistons ngadto sa 112-103 nga kadaogan batok sa Miami Heat, samtang si Paul George mipabuhagay og 37 puntos ug si Russell Westbrook miamot og 27 puntos sa dihang  gipakugangan  sa Oklahoma City Thunder ang Dallas Mavericks, 112-99. (BANAT NEWS)

  • Follow Us: