Reyes dismayado sa Gilas

CEBU, Philippines — Wa matago ni Gilas Pilipinas head coach Chot Reyes ang iyang kadismaya sa iyang mga batos human ang ilang 76-81 nga kapildehan sa mga kamot sa Alab Pilipinas atol sa usa ka tune-up game niadtong Sabado sa gabii didto sa Meralco Gym.

Bisan pa og usa lang kini na tune-up game, si Reyes seryoso sa maong duwa diin nakita niya ang kakuwang sa kadasig sa iyang mga sakop sa national team rasun nga napilde sila sa Alab.

Ang Gilas nangandam alang sa una nilang duwa sa FIBA World Cup qualifiers batok sa Japan karong Nobiyembre 24, apan sa iyang nakita, si Reyes miingon nga nawad-an siya gamay og gana nga moadto sa Japan.

“Well, we sucked big time,” matud pa ni Reyes sa Spin.ph “If we play like this, we better not even go to Japan, we have no chance.”

Bisan pa sa presensya sa mga PBA stars nga beterano na sa Gilas sama nila ni Jayson Castro ug JuneMar Fajardo, ang Gilas wa kasugakod sa paspas nga duwa sa Alab nga nagpreparar usab alang sa ilang kampaniya sa ASEAN Basketball League.

Si Reyes miingon nga daghan siya og nakit-an nga kuwang sa iyang koponan ug kinahanglan nga mahapsay nila kini karong semanaha diin mouban usab sa ilang ensayo si naturalized center Andray Blatche. (BANAT NEWS)