Nawung ni Irving nabuak, dili kaduwa karon
CEBU, Philippines — Nasuta nga nakahiagum og fracture ang nawung ni Boston Celtics superstar Kyrie Irving nga dili una paduwaon karon sa ilang sangka batok sa Toronto Raptors.
Si Irving wala katiwas og duwa niadtong Sabado human malup-og sa playing court dihang wa tuyua nga masikhan sa iyang teammate nga si Aron Baynes atol sa ilang kadaugan batok sa Charlotte Hornets.
Ang All-Star nga si Irving daku unta nga tabang sa Celtics nga nag-apas sa ika-12 nilang sunod-sunod nga daog karon nga maoy labing nindot nga record sa tibuok season.
Ang pagka-angol ni Irving dugang lang sa naglinya nga mga players sa injury list sa Celtics nga gilangkuban sa laing star nga si Gordon Hayward kinsa dili na makaduwa sa tibuok season tungod sa nabuak nga tiil, samtang ang veteran forward nga si Al Horford aduna usab gipamati sa ulo. Ang rookie nga si Jayson Tatum mupugos og duwa bisan pa sa nagsakit nga tiil.
"I think this team has a chance to be one of those teams that just kind of fights through adversity all the way," matud pa ni Celtics coach Brad Stevens sa Associated Press.
Muhulip una sa posisyon ni Irving ang reserve point guard nga si Shane Larkin. (BANAT NEWS)
- Latest
