Banat ( Leaderboard Top ), pagematch: 1, sectionmatch: 1

Rockets mipukan sa Cavs

CEBU, Philippines — Mihimo’g triple-double performance si James Harden sa iyang 35 points, 13 assists ug 11 rebounds aron motimon sa Houston Rockets pagpilde sa Cleveland Cavaliers, 117-113 sa nagpadayong aksiyon sa National Basketball Association kagahapon didto sa Toyota Center sa  Houston, Texas. 

Gumikan sa maong kadaogan, ang Rockets  nag-una na sa standing sa Western Conference uban sa Golden State Warriors sa managsama nilang 9-3  records.

Si Harden  aduna sa’y lima ka steals ug usa ka block sa Rockets nga miinat sa sunod-sunod nilang daog ngadto sa upat ka duwa.

Mikayod og maayo si Cleveland Cavaliers star LeBron James, apan nakawang lang ang iyang mga paningkamot  nasugamak na sab ang iyang koponan.

Si James mipugnit og 33 puntos lakip na ang iyang pagpangulo sa  13-1 rally sa final period, apan dili kini igo aron ihatag ang daog sa Cavs nga nalagpot na sa ika-11 nga dapit sa Eastern Conference uban ang 5-7 record. Si Jeff Green midugang og 27 puntos sa napildeng koponan. 

Labaw og siyete puntos ang Rockets human sa lay-up ni James sa nahabiling 10 minutos sa duwa. Ang Rockets miiskor sa mosunod nga sayes puntos, lakip na ang 3-pointer ni P.J. Tucker aron hatagan ang koponan og 111-98 nga bentaha.

Nahulga ang Rockets human makasikit ang Cavs, 111-112 kapin uno minuto ang nahibiling oras sa duwa, apan nainat sab dayon kini ngadto sa 115-111.

Didto sa Pepsi Center sa Denver, ang Nuggets mipatilaw  sa ikaupat nga sunod-sunod  nga pilde sa Oklahoma City Thunder, 102-94.

Ang Thunder nga adunay 4-7 record, gipangulohan ni Carmelo Anthony nga adunay 28 puntos, apan  sila si Russell Westbrook ug Paul George igo lang mipugnit og 13 puntos matag usa.

Sila si Paul Millsap ug Nikola Jukic mitikdol og 17 ug 15 puntos matag usa aron mangulo sa scoring sa Nuggets.

Sa uban pang mga resulta, ang Washington Wizards mipilde sa Los Angeles Lakers, 111-95, ang Toronto Raptors midaog sa New Orleans Pelicans, 122-118, samtang nakaipsot sab ang Sacramento Kings   sa Philadelphia 76ers, 109-108. (BANAT NEWS)

  • Follow Us: