Banat ( Leaderboard Top ), pagematch: 1, sectionmatch: 1

SIBA Tamarraws nidaog na gyud

CEBU, Philippines — Natambalan na gyud ang kauhaw sa SIBA Tamarraws human nila  sungaga ang team Lisen, 78-70  alang sa labing una nilang daog sa CELBA Second Conference basketball tournament niadtong Miyerkules sa gabii didto sa Canduman Housing gym, Mandaue City.

Bisan pa sa maong kadaogan,  ang SIBA Tamarraws pabilin gihapon nga nangiwit sa standing uban sa MS Motosuit nga napilde sab batok sa team Tion, 85-78.  

Si Rebie Templado maoy responsabli sa kadaogan sa SIBA nga miiskor og 15 puntos, si Wenn Canas mitampo’g 14 puntos. Wala sab magpabitin si team owner Jennifer Velasco nga miamot og 11 puntos sa maong kadaogan.

Ang Lisen nga adunay 4-2 record gipangulohan sab nilang Jealvan Achumbre ug Erwin Budiongan nga parehong miantog og 12 puntos.

Wala damha nga modaog ang SIBA kay sila man ang kanunay’ng naggukod gikan sa pagsugod ug diha na sila nakalabaw sa unang higayon, 31-29 sa nahibiling 4:10 kortesiya sa 3-point shot ni Velasco. 

Dali sab hinuon nakasukli og mga puntos ang Lisen aron moposte og 41-36 sa halftime.

Nakuha og balik sa SIBA ang labaw sa sayong bahin sa third period, 44-41 ug gitapos nila ang maong kuwarter sa iskor nga 63-53.

Nakaigwalis ang Lisen, 70-all sa nahibiling 2:57 nga nakapakulba sa duwa, apan nalansang ug wala na kini moirog pa hangtod nahurot ang oras.

Sa laing bahin, si Rey  Gonzaga mipabuhagay og 13 puntos aron mangulo sa balanseng opensa sa Tion nga aduna na’y 4-1 nga baraha.

Gipangulohan sab ni Richard Jordan ang MS Motosuit nga miratsada og 21 puntos, gisundan ni Rodel Royo sa iyang 17 puntos, samtang si Gilbert Sebandal mitampo’g 10 puntos sa team ni  MS Motosuit big boss Lou Ornopia.

Ang liga  nga  namugna  pinaagi  sa mga paningkamot sa presidente niining si PS/Insp. Dondon Coloscos ug bise presidente Tony Alcover sa abag nilang Albert Ramos, Lloyd Chavez, Richard Limosnero ug Wendell Oquias, gipaluyohan   ni Ronald Yap Elpa.

Puntos matag usa

Unang duwa:

TION (85) – Gonzaga 13, Gemongala 12, Gomez 9, Cabrera 9, Entapan 9, Villaflores 8, Setenta 6, Tion 5, Cabiluna 4, Englis 4, Ramos 3, Genobia 2.

MS Motosuit (78) –  Jordan 21, Royo 17, Sebandal 10, Ubas 8, Gelbolingo 8, Asis 6, Malazarte 5, Rama 4.

Ikaduhang duwa:

SIBA Tamarraws (78) – Templado 15, Canas 14, Velasco 11, Catinoy 8, Federez 6, Marabe 6, Prieto 6, Pios 5, Abarquez 3, Bathan 2, Abanid 2.

LISEN (70) – Achumbre 12, Budiongan 12, Puerto 10, Llanos 9, Villarosa 8, Landiza 6, Mendoza 6, Bernales 5, Rosacena 3, Dumaolao 1. (BANAT NEWS)

  • Follow Us: