Banat ( Leaderboard Top ), pagematch: 1, sectionmatch: 1

Celtics, 10-2 na

CEBU, Philippines — Gibingat sa Boston Celtics ang ilang winning-streak ngadto sa 10 ka duwa human sa ilang dominanteng 107-96 nga kadaogan batok sa Los Angeles Lakers kagahapon didto sa ilang korte sa TD Garden sa Boston, Massachusetts. 

Ang sentro nga si Aron Baynes mihimo og career-high 21 puntos aron mangulo sa tanang scorers sa Celtics nga miduwa nga wala ang All-Star bigman nga si Al Horford. Si Kyrie Irving nga nangulo sa rally atol sa second half miamot og  19 puntos.

Sa maong kadaogan, ang Celtics pabiling lider sa Eastern Conference sa ilang 10-2  win-loss record.

Gawas ni Horford, wala usab ang star rookie sa Celtics nga si Jason Tatum tungod sa injury.

Didto sa Oracle Arena sa Oakland, California,  nakuha na sa defending champion Golden State Warriors ang liderato sa Western Conference division human  miiskor  sa ikasiyam nilang daog sulod sa 12 ka duwa pinaagi sa pagpilde sa Minnesota Timberwolves, sa iskor nga 125-101.

Si Klay Thompson miposte og 28 puntos, lakip na ang unom ka tres aron bidahan ang Warriors nga miduwa nga wala ilang sinaligan nga si Kevin Durant  tungod sa gihambin nga injury. 

Si  Stephen Curry mipabuto og  22 puntos  uban ang  walo ka rebounds ug walo sab ka assists.

Sila si Andrew Wiggins ug Karl Anthony Towns mitali’g 17 ug 16 puntos alang sa Timberwolves, apan dili kini igo pag-inat sa lima ka sunod-sunod nilang daog.

Sa uban pang mga resulta, ang Detroit Pistons milubong sa Indiana Pacers, 114-97, gilubong sab sa Orlando Magic  ang New York Knicks, 112-99 ug ang Miami Heat midaog sa Phoenix Suns, 126-115. (BANAT NEWS)

  • Follow Us: