Manghod ni Lonzo Ball gidakop sa China

CEBU, Philippines — Ang manghod ni Los Angeles  Lakers star Lonzo Ball nga si LiAngelo  Ball,  usa sa tulo ka mga college basketball players nga gidakop sa China kagahapon sa suspisyon nga sila nag-shoplifting kon nanguha og butang sa usa ka tindahan nga wala bayri.

Si Ball, nga uban sa UCLA basketball team nga moduwa unta sa ilang season-opening game batok sa Georgia Tech didto sa Shanghai karong adlawa, gitanggong uban sa iyang mga teammates nga sila si Cody Riley ug Jalen Hill.

Gikataho sa ESPN nga ang mga magduduwa gisikop human ang 20 ka pulis miadto sa ilang hotel didto sa Hangzhou, nga gawas lamang sa Shanghai.

Wala hinuon gikompirma sa UCLA ang detalye sa maong  balita,  apan mipagawas sila og pamahayag nga nasayod sila sa nahitabo.

Si LiAngelo usa sa tulo ka managsuong Ball nga misikat sa Amerika ning milabay’ng mga tuig. Ang maguwang niyang si Lonzo mitapon dayon sa Lakers human sa usa lamang ka season uban sa UCLA. Ang ilang kamanghuran nga si LaMero nagduwa pa sa high school, apan ning sayo pa gitatakan nang daan nga mohimo sab og marka sa propesyonal nga liga sa umaabot. (BANAT NEWS)