Cavs namawi sa ilang korte

CEBU, Philippines — Mitala og season-high 32 puntos si Kevin Love, samtang si  LeBron James miamot og 30 puntos sa dihang ang Cleveland Cavaliers nakasugakod sa 40 puntos  ni Giannis Antetokounmpo aron pagpakaging sa Milwaukee Bucks, 124-119 sa NBA kagahapon didto sa Quicken Loans Arena sa Cleveland, Ohio.

Naospital kadiyot human miiskor og kuwatro puntos sa miagi nilang kaparotan batok sa Atlanta Hawks niadtong Lunes, bangis nga namawi si Love, kinsa milangkat sab og 16 ka rebounds. Nindot sab ang gipakitang labok ni J.R. Smith nga mikadlit og season-high 20 puntos alang sa Cavs nga mikulit sa  ikalima   nilang daog sa 11 ka duwa.

Pipila na lamang ka semana sa dili pa ang ika-23 niyang adlaw’ng natawhan, si Antetokounmpo mipasud og 16 sa 21 niya ka itsa, apan nakawang ang iyang paningkamot gumikan kay ang Bucks nahisukamod sa ikaupat nga sunod-sunod nga higayon.

Sa uban pang mga resulta, sila si LaMarcus Aldridge ug Danny Green nagkumboya’g 49 puntos sa dihang gipayaka sa San Antonio Spurs ang LA Clippers, 120-107, samtang si Kristaps Porzingis mibahog og 28 puntos alang sa New York Knicks, nga milatos sa Charlotte Hornets, 118-113 alang sa ikatulo nilang sagunson nga daog.

Wala sab magpaalkansi si Harrison Barnes nga mipabuhagay og 31 puntos sa dihang gilat-an sa Dallas Mavericks ang Washington Wizards, 113-99 aron putlon ang unom ka sunod-sunod nilang pilde. Si Dennis Smith Jr. miamot og 22 puntos ug si Wesley Matthews miposa og upat ka tres sa iyang 14 puntos alang sa Dallas  nga midaog og 14 sa katapusan nilang 15 ka panag-abot sa Washington.

Si John Wall miposte og 23 puntos ug 14 ka assists, apan wa’y nahimo kay ang Wizards napukan kalima sa katapusan nilang pito ka duwa.

Lain pang mikuha og atensiyon mao si Nikola Jokic nga mikadlit og career-high 41 puntos aron aswaton ang Denver Nuggets ngadto sa 112-104 nga kadaogan batok sa Brooklyn Nets ug ingon man si Anthony Davis nga mipabuto og 37 puntos ug  milangkat og 14 ka rebounds, ug si DeMarcus Cousins nga dunay 32 puntos ug 13 ka rebounds  sa dihang gipilde sa New Orleans Pelicans ang Indiana Pacers sa  iskor nga  117-112. (BANAT NEWS)