Fajardo duwa gihapon sa Gilas Pilipinas

CEBU, Philippines — Ang  reigning MVP nga  si   June Mar Fajardo, naturalized center Andray Blatche ug  team captain Jayson Castro maoy gitahasan aron mangulo sa Gilas Pilipinas alang sa ilang kampanya sa 2019 FIBA World  Cup  qualifiers diin    ilang   harungon ang Japan karong Nobiyembre 24 didto sa Tokyo.

Ang tulo lakip sa 23-man line-up nga pilian aron moporma sa Final 12 nga maoy moduwa sa maong home-and-away tournament.

Bisan pa sa kagubot sa PBA, nagkauyon ang tanang    team  sa  liga nga  mopahulam  sa  ilang   kinakusgan nga mga magduduwa agi’g suporta sa nasudnong koponan.

Si Fajardo mao ang saligan nga sentro, samtang moduwa pagbalik uban sa Gilas si Blatche.  Si Castro pabilin nga mogiya sa mga batan-ong guwardiya sa koponan.

Gawas sa tulo, laing  anaa sa lista mao sila si Terrence Romeo, Japeth Aguilar, Matthew Wright, Calvin Abueva, Raymond Almazan, Gabe Norwood, Allain Maliksi ubanan sa mga Gilas cadets sama nila ni RR Pogoy, Jio Jalalon, Carl Bryan Cruz, Troy Rosario, Kiefer Ravena, Mac Belo, Baser Amer, Mike Tolomia, Kevin Alas, LA Revilla, Kevin Ferrer, Rafael Escoto ug Von Pessumal.

Ang Gilas misugod na sa ilang preparasyon niadtong Biyernes didto sa kaulohan ug gikatakda nga mopaubos sila og sunod-sunod nga training camps ug tune-up games aron maandam sa torneyo.

Human sa ilang duwa batok sa Japan, ang Gilas mo-host sa  Chinese Taipei sa Nobiyembre 27 didto sa Smart Araneta Coliseum. (BANAT NEWS)