Villanueva, Nery magsukmagay na
CEBU, Philippines — Magpinaksitay na sila si WBC bantamweight champion Luis ‘Pantera’ Nery ug ang pambato sa ALA Boxing Gym nga si ‘King’ Arthur Villanueva sayo karong buntag oras dinhi sa Pilipinas didto sa GasMart Arena sa Tijuana, Mexico.
Atol sa official weigh-in kagahapon, si Nery mitimbang og 120 libras, samtang si Villanueva dunay gibug-aton nga 119 libras.
Si Villanueva gikatakda untang mohagit sa titulo ni Nery, apan nahulog na lamang ngadto sa usa ka 10-round non-title fight ang ilang sangka human si Nery nagpositibo sa matang sa druga nga gidili sa World Anti-Doping Agency.
Bisan pa man niini, usa gihapon kini ka mahinungdanong away alang ni Villanueva gumikan kay kun ugaling siya ang modaog, hayan nga mahimo man kini niyang hagdanan aron makab-ot ang dugay na niyang gipangandoy nga world title fight.
Sayod si Villanueva nga lisud modaog pinaagi sa desisyon sa teritoryo sa kontra mao nang iyang buhaton tanan kutob sa iyang mahimo aron ma-knockout niya si Nery. Lisud hinuon nga misyon ang sagubangon ni Villanueva gumikan kay si Nery wala pa’y pilde sa 24 ka away, diin 18 ka daog niini pinaagi sa knockout. Samtang si Villanueva dunay 31-2 record uban ang 17KOs. (BANAT NEWS)
- Latest