Narvasa giplanohang ilisan
CEBU, Philippines — Usa ka espesyal nga tigom ang gipatawag sa tanang PBA Board of Governors diin hisgutan ang kabahin sa termino ni PBA Commissioner Chito Narvasa kun magpabilin pa ba kini sa iyang pwesto.
Kahinumduman, nga niadtong Lunes pipila ka mga PBA team officials ang wala na makauyon ni Narvasa tungod sa sunod-sunod nga kontrobersiya sa liga. Gawas pa niini, duol na usab ang pagkapupos sa termino ni Narvasa ug nagpanagana na sila sa paghatag og lugway niini.
Adunay posibilidad mailisan si Narvasa kun moabot og walo sa 12 ka mga PBA team governors ang mobotar nga tapuson na ang termino ni Narvasa.
Usa ka wala magpaila nga tinubdan ang mibutyag sa The Philippine STAR, nga ang TNT KaTropa, Meralco Bolts, NLEX Road Warriors, Alaska Aces, Phoenix Petroleum, Rain or Shine Elasto Painters ug Blackwater Elite gusto nang pahawaon si Narvasa.
Dili matago nga dako og epekto sa reputasyon ni Narvasa ang iyang pagtugot sa San Miguel Beermen-Kia Picanto trade diin gibuhian sa nauwahi ilang No. 1 pick bugti ang tulo ka mga reserves sa Beermen.
Ang San Miguel milampos pagkuha sa Fil-German standout nga si Christian Standhardinger nga nakapalig-ong og samot sa koponan tungod kay gilangkuban kini og mga superstars sama nila ni JuneMar Fajardo, Marcio Lassiter, Chris Ross, Alex Cabagnot ug Arwind Santos.
- Latest