“Pinoy Pride 43” fight card nga bidahan ni MAGSAYO nahitsas na
CEBU, Philippines — Kumpleto na ang “Pinoy Pride 43” fightcard nga pasiugdahan sa ALA Promotions ug ABS-CBN Sports karong Nobiyembre 25 didto sa Tagbilaran City
Sa main event, ang garbo sa mga Bol-anon nga si Mark ‘Magnifico’ Magsayo modepensa sa iyang WBO International featherweight title batok sa Japanese challenger nga si Shota Hayashi.
Si Magsayo wala pa’y pilde sa 17 ka away nga gidayan-dayanan og 13 ka daog pinaagi sa knockout, samtang si Hayashi nagkupot og 30-6-1 record uban ang 18KOs.
Sa undercards, angayan sab nga atngan ang away nilang ‘Prince’ Albert Pagara, Jeo Santisima, Melvin Jerusalem ug Christian Bacolod.
Si Pagara (28-1, 19KOs), makigpinaksitay ni Mohammed Kambuluta (16-3, 5KOs), si Santisima (14-2, 12KOs) makigbinukbukay ni Kichang Kim (8-4-1, 2KOs), si Melvin Jerusalem (11-1, 6KOs) moharong ni Pedro Taduran, samtang si Bacolod (7-0, 5KOs) mohamag ni Lowell Saguisa.
Lain pang moaway mao sila si Rocky Fuentes batok Ryan Tampus, Virgel Vitor batok John Ray Logatiman ug Esneth Domingo batok Delfin de Asis.
- Latest