USC South mihakot duha ka daog sa CYBL
CEBU, Philippines — Ang University of San Carlos South Campus mikulit og kaluhang daog sa Cebu Youth Basketball League 3rd Conference nga giduwa niadtong weekend diha sa SHS-Ateneo de Cebu Mango Avenue campus gym.
Sa Under 10, ang USC South mipakaging sa PAREF-Springdale, 29-15, samtang ang ilang mga katropa sa Under 15 Division 1 milampaso sa USJ-R, 60-41 aron pagpabiling wa’y pilde sa duha ka duwa.
Sa lain pang mga aksiyon sa Division 1, ang Sisters of Mary Boystown School milansang sa una nilang daog human gilubong ang USJ-R, 44-24, samtang ang USPF 2-0 na human gilampurnas ang Thumbs Up-A, 86-36.
Sa Under 12 age group sa Division 2, ang Monterrey School of Talisay mipayaka sa SCSIT, 46-33, ang Cebu Elite mipiog sa USC South, 26-23, samtang ang Ermita mipakurat sa SWU-Phinma, 40-35.
Sa Under 15 Division 2, ang Coach Leo Basketball Academy midaog batok sa SHS-AdC 3, 49-20, ang Compre 2-0 na human gipakaging ang Cebu Elite B, 68-22, ang One on One-B miwani sa SACS, 60-37, ang Cebu Elite A mitikdol sa PAREF-Springdale, 45-28, samtang ang Alocillo Training School-2 mipatigbabaw batok sa RD Basketball, 46-23.
Wa sab magpabitin ang DSOMNHS/Labangon nga mitala sa ikaduha nilang daog human gipaluhod ang Thumbs Up-B, 52-46, ingon man ang SCSIT nga mitusik sa una nilang daog kortesiya sa 48-43 nga desisyon batok sa RD Basketball.
- Latest
