Celtics mipakugang sa Spurs

CEBU, Philippines — Si Kyrie Irving miiskor og 24 puntos, samtang sila si Jaylen Brown ug Al Horford nagkumboya’g 31 puntos sa dihang gipakaging sa Boston Celtics ang  San Antonio Spurs, 108-94  aron inaton ang sagunson nilang daog ngadto sa lima ka duwa sa NBA kagahapon didto sa TD Garden sa Boston, Massachusetts.

Mao kadto ang ikatulong sunod-sunod nga higayon nga si Irving mitali og 24 puntos, ang rookie nga si Jayson Tatum milangkat og 11 ka rebounds samtang si Terry Rozier mitali og 10 sa iyang 12 puntos sa katapusang kuwarter alang sa Celtics nga padayong mihimo og impresyon human nasugamak sa  unang   duha nila ka duwa karon nga season. Wala sila molingi pa human milansang og 54-49 nga labaw sa halftime.

Si Brandon Paul dunay 18 puntos ug si Rudy Gay mikulit og 14 puntos alang sa Spurs  nga misukarap ngadto sa ikatulo nilang sunod-sunod nga pilde. 

Sa gihapon, wala ang duha nila ka bitoon nga sila si Tony Parker ug Kawhi Leonard nga parehong dunay injury.

Sa labing unang higayon, si LaMarcus Aldridge dili maoy topscorer sa Spurs gumikan kay nalimitahan kini ngadto lamang sa 11 puntos.

Didto sa New York, si Kristaps Porzingis mirehistro og career-high 38 puntos, samtang si Kyle O'Quinn midugang og 15 puntos ug 12 ka rebounds aron pagtuboy sa Knicks ngadto sa 116-110 nga kadaogan batok sa Denver Nuggets.

Ang Knicks mikolapso human milabaw og 23 puntos, apan si Tim Hardaway Jr. misalbar kanila pinaagi sa pagbubo sa tanan niyang 13 puntos sa katapusang kuwarter.

Ang Knicks nagbitbit na karon og 3-3 record, samtang ang Nuggets nakatilaw sa ikaupat nilang pilde sa pito ka duwa.