Global Cebu nakaipsot
CEBU, Philippines — Ang Global Cebu FC mieskapo uban ang 3-2 nga kadaogan batok sa Ilocos United FC aron pahayagan ang ilang kampanya nga makasud sa “Top Four” sa 2017 Philippines Football League (PFL) sa miaging gabii diha sa Cebu City Sports Center.
Unang nakaiskor ang Ilocos United kortesiya ni Arthur Kouassi sa ika-19 nga minutos, apan mibawos ang Global Cebu pinaagi ni Darryl Roberts nga mipaslak og duha ka sagunson nga goals sa ika-21 ug ika-43 nga minuto.
Nakaiskor sab dayon hinuon og balik si Kouaasi aron pagtabla sa iskor, 2-2 atol sa halftime.
Determinado nga dili mauwawan atubangan sa ilang fans, si Wesley Dos Santos mitikdol og goal sa ika-78 nga minuto aron pagtuboy sa Global Cebu ngadto sa ika-11 nilang daog sulod sa 24 ka duwa.
Gumikan niini, gipahugtan sa Global Cebu ang ilang pagkupot sa ikaupat nga puwesto bitbit ang 40 puntos.
Naghari gihapon sa liderato ang FC Meralco Manila uban ang 51 puntos ug gisundan kini sa Kaya Makati nga dunay 47 puntos ug Ceres Negros nga dunay 45 puntos.
Sangkaon sunod sa Global Cebu ang Stallions Laguna karong Nobiyembre 2. Moasdang dayon sila batok sa Ilocos United karong Nobiyembre 5 ug batok sa FC Meralco Manila karong Nobiyembre 19 sa dili pa mobalik sa ilang nataran alang sa katapusan nilang duwa sa eliminasyon batok sa Ceres Negros karong Nobiyembre 28. (BANAT NEWS)
- Latest