Pelicans mituhak sa Cavs, Westbrook kulit bag-ong record

CEBU, Philippines — Si DeMarcus Cousins mirehistro og triple-double samtang si Anthony Davis nanginit dayon sa iyang pagbalik gikan sa injury aron pagbagnos og 30 puntos sa dihang gilampaso sa New Orleans Pelicans ang Cleveland Cavaliers, 123-101, sa NBA kagahapong adlawa didto sa Smoothie King Center sa New Orleans, Louisiana.

Mikadlit si Cousins og 29 puntos uban ang 12 ka rebounds ug 10 ka assists alang sa labing una niyang triple-double sukad siya mipasilong sa poder sa New Orleans.

Si Davis milangkat sab og 14 ka rebounds, si Jrue Holiday mitimbre og season-high 29 puntos ug pito ka assists, samtang si E'Twaun Moore mipabuhagay og career-high 24 puntos alang sa Pelicans, nga wala na molingi pa sukad nakalabaw og 15 puntos sa unang kuwarter dayon na ngadto sa ikatulo nilang daog sa unom ka duwa.

Si Kevin Love mipupo og 26 puntos ug 11 ka rebounds apan si Cavs superstar LeBron James nalimitahan ngadto lamang sa 18 puntos, lima ka rebounds ug walo ka assists hinungdan sa ilang pagkasukarap ngadto sa 3-3.

Didto sa United Center, si reigning MVP Russell Westbrook mikadlit og 12 puntos, 13 ka rebounds ug 13 ka assists sa dihang giihaw sa Oklahoma City Thunder ang Chicago Bulls, 101-69.

Misuwat sab og record si Westbrook isip labing unang player sa NBA nga nakamugna og triple-double batok sa 29 nila ka mga kaatbang nga koponan.

Sila si Carmelo Anthony ug Paul George nagkumboya og 41 puntos, samtang sila si Steven Adams ug Raymond Felton mitikdol og 12 puntos matag usa alang sa Thunder, nga nagbitbit na karon og 3-3 record. Ang Bulls nasugamak sa ikaupat nilang pilde sa lima ka duwa.

Sa lain pang aksiyon, si Los Angeles Clippers coach Doc Rivers nadismaya og maayo sa dihang ang iyang koponan gipatilaw sa Detroit Pistons sa labing una nilang pilde, 95-87.

Ang maong kaparotan nagtagak sa Clippers ngadto sa ikaduhang dapit sa Western Conference sunod sa Memphis Grizzlies, nga mibungkag sa Houston Rockets, 103-89. (BANAT NEWS)