Joshua gusto ma-undisputed world champ

CEBU, Philippines — Nanghinaut si Anthony Joshua  nga magmalampuson sa ikaupat niyang depensa batok ni Carlos Takam didto sa Cardiff, Wales karong adlawa aron walay mamahimong babag sa iyang damgo nga mamahimong undisputed world champion sunod tuig.

Inilog kaayo si Joshua sa pagpanalipod niya sa iyang IBF heavyweight title ilabi na kay ang Cameroonian niyang challenger hulip lamang sa orihinal unta niyang kontra nga si Kubrat Puvel, kinsa miatras sa ilang away human maangol ang abaga atol sa iyang training.

Bisan pa man niini, daghan gihapon ang modugok sa away nga gibana-bana ni promoter Eddie Hearn moabot ngadto sa 70,000 ka mga tawo.

Si Joshua mao karon ang naghari isip heavyweight champion sa IBF ug WBA human gipatikangkang sa ika-11 nga hugna ang kanhi kampiyon nga si Wladimir Klitschko niadtong Abril.

Batok ni Takam, si Joshua mipadayag nang daan nga dili siya mohatag og bisan gamay nga kompiyansa ilabi na kay nasayod siya kun unsa kamahinungdanon kining awaya alang kaniya.

Kun ugaling modaog ni Takam, target sunod ni Joshua mao sila si WBO champion Joseph Parker ug WBC champion Deontay Wilder. (BANAT NEWS)