Magsayo mobida sa Pinoy Pride 43

CEBU, Philippines — Dad-on og balik sa probinsiya sa Bohol ang  dakong kalihukan sa boksing diin ang wa’y pildeng si Mark ‘Magnifico’ Magsayo  (17-0, 13KOs) sa ALA   Gym manalipod sa iyang WBO International featherweight title batok ni Shota Hayashi (30-6, 18KOs) sa Japan sa main event sa “Pinoy Pride 43” sa Nobiyembre 25 didto sa Tagbilaran City.

Si Magsayo mohimo sa ikatulo niyang title defense uban ang paglaum nga mopaduol   sa iyang damgo nga moaway alang sa kalibotanong titulo.

“Mura’g duol na gyud ko sa akong damgo. Kinahanglan lang ko modaog sa akong mga away.

Andam nako sa world champion fight apan depende gihapon   kini sa akong promoter,” matud pa sa WBO ranked No. 6 nga si Magsayo atol sa press conference kagahapon didto sa St. Mark's Hotel.

“Lig-on daw ni akong kontra. Mas maayo para masuwayan gyud ug mapakita nako kun unsa ako abilidad,” dugang pa sa 22-anyos nga si Magsayo nga naghinam-hinam na nga moaway sa labing una niyang main event fight sa Bohol.

Si Magsayo miiskor og duha ka sunod-sunod nga first round knockout  victories batok sa Tanzanian nga si Issa Nampepeche niadtong Abril 29 ug ang labing bag-o batok ni   Nicaraguan Daniel Diaz niadtong Hulyo 8.

Sa iyang bahin, ang kanhi Japan featherweight champion nga si Hayashi lab-as pa gikan sa iyang third round stoppage ni Filipino Markquil Salvana niadtong Septiyembre 2 didto sa Aioi Hall sa Kariya, Japan.

Sa supporting bouts, ang duha ka ALA knockout artists nga sila si ‘Prince’ Albert Pagara ug Jeo ‘Santino’ Santisima  mopakita sab sa ilang abilidad batok sa tagsa-tagsa nila ka mga langyaw’ng kaatbang.

Si Pagara (28-1, 19KOs) makigharong ni Mohammed  Kambaluta (17-3, 6KOs)  sa Tanzania,  samtang si Santisima (14-2, 13KOs) moatubang  ni Kichacng Kim sa Indonesia (8-4, 2KOs). (BANAT NEWS)