Paul George nangandam sa sangka batok kanhi team

CEBU, Philippines — Sa ikaupat pa lamang nila nga duwa karon nga season, atubangon na dayon ni Paul George ang team nga iyang gibiyaan sa dili kaayo ideyal nga sirkumstansiya.

Kini kay atol sa off-season, gipahibawo na daan ni George ang iyang plano nga mamahimong usa ka free agent sunod season.

Nakapadismaya kini sa Pacers nga nangita dayon og paagi aron i-trade si George kay sa motinir pa sila sa ilang bitoon nga lagmit wala na’y gana nga moduwa uban kanila.

Tuod man, gilabog gyud sa Pacers si George ngadto sa Oklahoma City Thunder hulip nilang Victor Oladipo ug Domantas Sabonis.

Sa dihang naa pa siya sa poder sa Indiana, si George upat ka higayon nga nahimong All-Star ug migiya sa Pacers ngadto sa Eastern Conference Finals duha ka higayon.

Mao na nga sa ilang pag-host sa Pacers karong adlawa, si George emosyonal gamay nga nangandam sa duwa ilabi kay dili man sab mahikalimtan ang iyang kasinatian uban sa Indiana. (BANAT NEWS)