Curry gipamulta’g $50T; IGuodala $15T

CEBU, Philippines — Nakaeskapo sa suspensiyon si Golden State Warriors superstar Stephen Curry, apan gipamulta kini og $50,000 gumikan sa paglabay niini sa iyang mouthguard ngadto sa usa ka opisyal sa duwa.

Kahinumduman, nga ang two-time MVP na-ejected human miulbo ang kaspa niini sa tumang kalagot sa naghinapos nga bahin sa katapusang kuwarter atol sa 101-111 nilang kaparotan batok sa Memphis Grizzlies niadtong Domingo.

Makita nga ang 29-anyos nga point guard miitsa sa iyang mouthpiece samtang nakiglalis sa reperi, kansang tawag wala niya mauyoni.

Ang teammate ni Curry nga si Andre Iguodala gipabayad sab og $15,000 gumikan sa pagpangabuso gihapon niini sa reperi gamit ang hait nga pulong sa susamang insidente. 

Gawas ni Curry, si Kevin Durant na-ejected sab sa gubot pa’s lukot nga kapildihan.

Mipasabot hinuon si Curry nga ang nahitabo mugna lamang sa  iyang emosyon niadtong tungora ug wala niya gitumong nga ig-on nungka tuyo nga pasakitan ang reperi nga iyang gikalagotan sa dihang iyang gilabay ang iyang mouthpiece.

Nangayo na og despensa si Curry sa dili makiangayon niyang aksiyon uban ang  saad nga iyang kat-onan og leksiyon ang maong insidente sa ingon dili na  masubli pa ang iyang gibuhat. (BANAT NEWS)