GT Mommies abante sa Finals; E&F Surplus nakaginhawa pa

CEBU, Philippines — Miabante na sa finals ang GT Cool Mommies, samtang ang E&F Surplus nakaangkon pa og laing kinabuhi human gimasaker ang tagsa-tagsa  nilang kaatbang sa 9th J&J Surplus Ballclub basketball tournament.

Walay kulba ang ilang kadaogan gumikan kay gilubong sa GT Mommies ang A&G Blizzard sa tagakay nga Game-3 sa iskor nga 101-64, samtang ang E&F Surplus midemolis sa VHA subdivision sa Game-2 sa iskor, 81-59 aron malugwayan pa ang serye niadtong Sabado sa gabii didto sa GT Academy gym sa Tayud, Lilo-an.

Si Almer Icot maoy nangulo sa upat ka players nga nakaiskor og double figures pinaagi sa iyang 21 puntos. Lain pang naka-double digits mao sila si Edwin Apas  nga miposa og 18 puntos, Roland Monte sa iyang 12 puntos ug Kevin Patalinghug nga adunay 10 puntos.

Dili na malalis ang resulta sa duwa human ang GT Mommies milabaw og 34 puntos paghuman sa third period, 77-43.

Samtang nagkagamay ang oras, nagdako sab ang labaw sa GT Mommies nga maoy gihimo nilang hagdanan aron makab-ot ang tam-is nga kadaogan.

Ang A&G Blizzard gipangulohan sab ni Arvin Tolentino nga mikamada og 24 puntos, gisundan nilang Rommel Bucatan ug Jymwheel Torregosa sa ilang 18 ug 14 puntos matag usa.

Sa laing bahin, nagbangis og maayo si  Tingan Gestopa ug gipangulohan ang E&F Surplus human makapabuto og 25 puntos. 

Ang team owner nga si Fury ‘Triggerman’ Trazona nga mao sab ang league commissioner nalimitahan lang ngadto sa 11 puntos sa iyang koponan nga nakapanimaho na sa ilang sayong kadaogan  human moposte og 51-27 sa halftime.  

Nakabawibawi ang VHA sa fourth quarter, apan ulahi na ang tanan.

Ang VHA ni Cyrille Matarzo   gipangulohan sa managsuong Berdin nga  sila   si  Rickymhar ug Reymhar nga nagkumboya og 36 puntos, samtang si Jebb Layese miabuno’g 10 puntos.

Ang Game-3 himuon karong gabii ug ang modaog maoy makabaton og katungod nga  moharong sa nagpaabot nga GT Mommies sa finals ning maong liga ubos sa bendisyon sa presidente nilang si Henry Agbon.

Puntos matag usa

Unang duwa:

E&F Surplus (81) –Gestopa 25, Trazona 11, Betinol 8, Trangia 8, A. Sabang 7, Caballes 4, Nuñez 4, Ponce 3, Palo 3.

VHA  (59) – Berdin 22,  Berdin 14, Layese 10, Gandionco 4, Belisario 3, Abaracin 2, Lecciones 2.

Ikaduhang duwa:

GT Mommies (101) – Icot 21, Apas 18, Monte 12, Patalinghug 10, Cabahug 8, Ponce 7, Veronilla 5, Adaptar 4, Apas 3.

A&G Blizzard (64) – Tolentino 23, Bucatan 18, Torregosa 14, Muñez 9, Borres 4, Apostol 2, Gagani 2. (BANAT NEWS)