PBA title maoy damgo ni Pogoy

CEBU, Philippines — Gikalipay og dako ni Cebuano rookie Roger Pogoy ang pagdaog niya sa PBA Rookie of the Year award, apan ang TNT KaTropa gunner nagkanayon nga mas naghandum siya nga makatilaw sa labing una niyang PBA championship.

"Siguro marami pang kulang," matud pa ni Pogoy sa PBA.com. "Kasi yung Rookie of the Year award, bonus lang yan. Ang importante talaga is mag-champion."

Si Pogoy mitug-an nga wa niya damha nga makuha ang ROY award tungod kay kusug nga gidungog sa wala pa ang Leo Awards niadtong Biyernes nga ang Phoenix Fuel Masters guard nga si Matthew Wright ang musakmit sa maong award.

Si Pogoy miingon nga daku niyang utang kabubut-on ang sayung kalampusan sa iyang PBA career sa TNT management ilabi na ni coach Nash Racela kinsa mihatag og dakung salig sa iyang abilidad pinaagi sa paghatag niya og playing time.

Gawas sa nindot niyang season debut sa PBA diin mi-average siya og double figures, si Pogoy nahimo usab nga sinaligan sa Gilas Pilipinas sa mga miaging international tournaments. — (BANAT NEWS)