Warriors, Cavs nangapukan
CEBU, Philippines — Pulos nakatilaw og pilde ang mga finalists sa miaging season nga Golden State Warriors ug Cleveland Cavaliers batok sa tagsa-tagsa nila nga mga kaatbang sa bag-o lang gisugdan nga NBA season.
Ang defending champion nga Warriors nakatilaw sa ikaduha nilang pilde sud sa tulo ka duwa batok sa Memphis Grizzlies, 101-111, kagahapon didto sa Memphis, Tennessee.
Wa kaarti ang Warriors batok sa init nga opensa sa Grizzlies nga wala mohatag og kahigayunan kanila nga makalabaw. Gawas sa pilde, laing sakit nga ulo usab ang natagamtaman sa Warriors tungod kay posibleng silotan og multa ang duha nila ka stars nga sila si Stephen Curry ug Kevin Durant human kini wa mutahod sa mga referee.
Si Curry daling gipalagpot sa playing court human labaya og 'mouthpiece' ang referee, samtang gisunod og eject si Durant human kini mibalikas sa mga officials ug pipila ka Grizzlies fans.
Didto sa Orlando, Florida, wala usab kaugpo ang Cavaliers human sila gipakaging sa Magic, 93-114, sa pagpangulo ni Nikola Vucevic kinsa miiskor og 23 puntos.
Ang Magic nanginit sa three-point area rasun nga wala kasagang ang Cavs sa ilang init nga opensa. Si LeBron James midiga og 22 puntos alang sa Cavs nga nakatilaw sa una nilang pilde sud sa tulo ka duwa.
Sa ubang mga resulta, ang Utah Jazz mipatilaw usab og pilde sa laing powerhouse team nga Oklahoma City Thunder, 96-87, ang Milwaukee Bucks misungag sa Portland Trail Blazers, 113-110 ug ang Houston Rockets pabiling way pilde human gibombahan ang Dallas Mavericks, 107-91. — (BANAT NEWS)
- Latest
