Yoyi’s Pastries champion sa 20th FYA Caging

CEBU, Philippines — Sangko sa langit ang kalipay nga gidapit sa Yoyi’s Pastries & Dessert human ilang gipilde ang Premier Escape Realty sa kulbahinam nilang final match, 78-75 aron pagsakmit sa korona sa 20th F. Llamas Youth Association (FYA) basketball tournament niadtong Domingo didto sa Vicente Sotto gym sa   Barangay Punta Princesa sa dakbayan sa Sugbo.

Sa duwa alang sa ikatulong dapit, ang Boyet Cardoor Shop midaog gyud human makaipsot batok sa CRV, 103-101.

Sila si Dexter Caballero ug ang best player nga si Christian Laud parehong miratsada og  21  puntos  sa  Boyet Cardoor ni team owner Boyet Duran.  Naka-double figures sab sila si Christian Lavandero ug Mervin Manila.

Nausik ang 32 puntos ni Niko Laborte kay wala makalahutay  ang CRV ni Christian Roy Villacastin. Si Ranel Patalita mitampo og 26 puntos, samtang ang team leader nga si Baeng Medalle miamot og 25 puntos ug 10 puntos gikan ni Raul Cueme.

Sa laing bahin, doble ang kadaogan sa Yoyi’s Pastries ni team owner Alhmark Albarracin gumikan kay giharos sa duha niya ka players ang labing taas nga dungog.

Si Juls Aglipa maoy gibayaw  isip Final MVP ug si Dandan Enriquez maoy Season MVP. Si Aglipa nga mao sab ang best player ug si Enriquez parehong miiskor og 19 puntos ug awtomatik sab silang nalakip sa Mythical Five uban nilang Jade Ursal sa Premier Escape Realty, Mervin Manila sa Boyet Cardoor ug Niko Laborte sa CRV.

Naglisud ang Yoyi’s Pastries pagsugod hinungdan nga nalubong sila og 18 puntos sa first quarter, 10-28. Imbes maluya, nadasig hinuon ang Yoyi’s Pastries ug padayong nanlimbasog aron makan-an ang labaw sa halftime, 42-48.

Nahimong kulbahinam ang duwa dihang nagpuli-puli na og labaw ang duha ka kampo. Katapusang nakalabaw ang Premier 

Escape, 68-67 kay wala man milurang ang kainit sa Yoyi’s Pastries.  Ang free throws ni Enriquez maoy miselyo sa daog sa Yoyi’s Pastries. 

Si Jao Rabadon mitampo’g 16 puntos sa maong kadaogan.

Ang Premier Escape nilang Junrey Arreglo ug Allan John Abella gipangulohan nilang Jade Ursal nga mikadlit og 23 puntos, gisundan ni Victor Lastomen sa iyang 10 puntos. 

Lain pang nidawat og individual  award mao sila  si  Jobert  Barro (most improve player), Wako Dacayana  (defensive player), Dondon  Cadungog  (steal), Juls Aglipa (assist) ug Edgar Noquillo  (sportsmanship).

Ang liga nahimong posible tungod sa   paningkamot sa mga sakop sa organizing committee, ilabi na nilang  Kapitan Boy Atillo ug FYA adviser Rady Abarintos nga nitabang og dumala sa maong kalihukan.

Puntos matag usa

Unang duwa:

(For third place)

BOYET Cardoor (103) – Caballero 21, Laud 21, Lavadero 18, Manila 15, Sarsaba 9, Regudo 8, Daguhoy 5, Arches 4.

CRV (101) – Laborte 32, Patalita 26, B. Medalle 24,  Cueme 10, E. Noquillo 4, G. Noquillo 4, Cadungog 2.

Ikaduhang duwa:

(Championships)

YOYI’s Pastries (78) – Enriquez 19, Aglipa 19, Rabadon 16, Largo 5, Sy 4, Sydiongco 4, Albarracin 4, Tabares 3, Salvador 2, Auditor 2.

PREMIER Escape (75) – Ursal 23, Lastomen 10, Cadungog 9, Marata 7, R. Tabares 6, D. Tabares 4, Mata 3, Limbaga 3, Abella 2, Dacayana 2, Arreglo 2, AJ Abella 2. (BANAT NEWS)