Bolts laraw motabla sa series
CEBU, Philippines — Mapiangan ang Meralco Bolts gumikan kay ang star forward nilang si Ranidel De Ocampo nakaangkon og seryosong injury.
Apan bisan pa niini, kompiyansa sila nga makatabla sa series pinaagi sa pagpilde sa Barangay Ginebra Kings sa Game-4 sa ilang “best-of-seven” finals sa PBA Governors’ Cup karong gabii didto sa Smart Araneta Coliseum.
Si De Ocampo, usa sa mga sinaligan sa mga lokal sa Meralco nakahiagum og gisi sa iyang calf muscles ug posible nga dili na siya katiwas sa finals series.
Bisan pa niini, si Bolts coach Norman Black wala mawad-i og paglaum ug pabiling positibo nga ilang mapalagpot ang Kings sa trono ilabi na nakahimo sila og dominante nga daog, 94-81 sa Game-3 niadtong Miyerkules.
Sa pagkawala ni De Ocampo, si Black nakakita og kahayag pinaagi ni Reynel Hugnatan nga sa wala damha miiskor og 22 puntos gikan sa bench aron tabangan ang Meralco.
Gidugang usab ni Black nga miresulta ang nindot nilang depensa ngadto sa Best Player of the Conference sa Ginebra nga si Greg Slaughter nga ilang nalimitahan ngadto sa 12 puntos.
Sa laing bahin, sa dili pa ang duwa sa alas-7, ipahigayon una ang Leo Awards diin nganlan na ang season MVP, Rookie of the Year, Coach of the Year ug uban pang individual achievers sa season. (BANAT NEWS)
- Latest
