San Miguel inspirasyon sa Meralco
CEBU, Philippines — Kun nabuhat sa San Miguel Beermen kaniadto, dako og salig si Meralco Bolts coach Norman Black nga makahimo usab sila og bangon ug molampos pagsakmit sa PBA Governors’ Cup title bisan pa og gibiyaan na sila sa serye, 0-2 sa Barangay Ginebra Kings.
Ang Meralco napilde gihapon sa Ginebra sa Game-2 niadtong Domingo, 78-86 ug kinahanglan nila nga makabawi aron likayan ang delikadong sitwasyon sa ilang best-of-seven finals series.
“There were instances when teams were down 3-0 and came back and won. San Miguel did it recently over Alaska. So it’s possible,” matud pa ni Black sa The Philippine STAR.
Ang American coach nga si Black miingon nga kinahanglan nila nga mopakita og kadasig bisan pa og gibiyaan na sila sa serye. Wa’y problema si Black sa ilang best import nga si Allen Durham nga padayong mipakita og nindot nga duwa, apan hangtod karon wala siya makakita sa paningkamot sa iyang mga lokal.
Gipasabot ni Black mao sila si Jared Dillinger ug Ranidel De Ocampo nga gamay ra kaayo og natampo sa unang duha ka duwa.
Ang Game-3 gitakda ugma didto sa Smart Araneta Coliseum. (BANAT NEWS)
- Latest
