Oporto misidlak sa 100km ComVal ultra race

CEBU, Philippines — Ang Sugboanong ultra racer nga si Rhoda Oporto midugang og laing tropeyo sa iyang koleksiyon human nanghawod sa women’s division sa 4th Southern Philippines Unified Ultra Marathon sa Compostela Valley niadtong weekend.

Si Oporto nga kasamtangang nagpuyo sa dakbayan sa Lapu-Lapu, mikumpleto  sa  makutas  nga lumba nga naglangkob og 100 kilometro sulod sa 13 ka oras ug 23 minutos.

Gumikan niini, gikulit ni Oporto ang iyang pangan sa bato isip labing unang babaye nga nakalahutay sa maong karera. Sa kinatibuk-ang resulta apil ang lalaki niyang mga kaatbang, mitapos siya sa ikaunom nga puwesto.

Human sa malampuson niyang salida sa SPUUM, daw sa wala na’y pahuway si Oporto gumikan kay gikatakda na sab siya nga mosalmot sa North-West 160 km. Ultra Marathon gikan sa lungsod sa Daanbantayan hangtod sa dakbayan sa Sugbo agi sa Transcentral highway karong Nobiyembre 18. (BANAT NEWS)