“Superteams” misulbong aron mohagit sa Warriors
CEBU, Philippines — Dili malalis nga ang defending champion Golden State Warriors mao gihapon ang labing inilog nga koponan sa umaabot nga 2017-2018 NBA season nga gikatakdang mosikad ugmang adlawa.
Kay gibitoonan og upat ka superstars nga naglangkob nilang two-time MVP Stephen Curry, Kevin Durant, Klay Thompson ug Draymond Green, ang Golden State usa gihapon ka dekalibreng puwersa nga lisud tumbahon.
Gani ning sayo pa, gisaytan na sa Warriors ang ikatulo nilang korona sulod sa upat ka seasons.
Apan ning higayona, dili sayon nga tahas ang ilang sagubangon gumikan sa pagsulbong sa pipila ka “superteams” nga andam mohatag kanila og lisud nga hagit.
Gawas sa Cleveland Cavaliers nga dunay lima ka All-Stars nga sila LeBron James, Kevin Love, Dywane Wade, Derrick Rose ug Isaiah Thomas, dili sab kabintahaan ang Oklahoma City Thunder gumikan sa presensiya nilang Russell Westbrook, Carmelo Anthony ug Paul George ug ingon man ang Houston Rockets nga moparada nilang James Harden ug Chris Paul. Lain pang gilantaw nga maghatag kanila og labad sa ulo ang Boston Celtics ubos sa liderato nilang Kyrie Irving ug Gordon Hayward.
Apan alang ni Green, wa’y bili ang usa ka “superteam” kun ang matag usa ka player dili magkasinabot ug magpatas-anay og garbo.
Masukod ang kapasidad sa mga superteams ugmang adlawa diin ang Celtics manulong sa Cavaliers ug ang Rockets moasdang sa Warriors. Ang Thunder moabli sa ilang kampanya karon pang Biyernes batok sa New York Knicks, nga mao ang kanhi koponan ni Anthony.
(BANAT NEWS)
- Latest
