Lancers naanad pilde sa sugod, apan daog sa katapusan

CEBU, Philippines — Pildero sa sinugdanan.  Daogon sa katapusan.

Mao kini ang tipik sa estorya sa University of the Visayas (UV) Green Lancers kabahin sa mabulukon nilang kampanya sa 17th Cebu Schools Athletic Foundation, Inc. (CESAFI) basketball season.

Atol sa pre-season tournament nga ilang giapilan didto sa Saint Bernard, Southern Leyte niadtong Mayo, ang Lancers nasugamak sa una nilang duwa batok sa Southwestern University-Phinma (SWU) Cobras, apan madasigon silang mibangon dayon na ngadto sa pagsakmit sa kampiyonato sa St. Isidore Parish Fiesta Invitational Basketball Cup.

Maora’g ila na kining nabatasan sa regular CESAFI season.

Atol sab sa una nilang duwa niadtong Agosto 6, ang Lancers gipilde sa University of San Carlos (USC) Warriors, 73-78.

Apan si UV coach Gary Cortes wala mabalaka niini gumikan sa dako niyang pagsalig   sa iyang mga batos.

“Naanad nami ana kanang mapilde mi sa among first game,” matud  pa ni Cortes sa dihang nahinabi niadtong higayona.

Human sa maong kaparotan, ang Lancers nagmangtas aron pagharos og daog sa sunod nilang 11 ka duwa aron pagdominar sa duha ka hugna nga eliminasyon. Miabante sab dayon sila sa kampiyonato human gipalagpot ang USC Warriors.

Apan sa Game 1 sa best-of-three finals series, ang Lancers naghagba ngadto sa kamot sa University of Cebu (UC) Webmasters , 77-85.

Sama sa ilang gibuhat sa miagi, ang Lancers miresbak.

Human nakaangkon og laing kinabuhi bugti sa 77-66 nilang kadaogan sa Game-2, ang Lancers hingpit nga mipalukapa sa Webmasters, 69-56 sa tagakay nilang Game-3 aron pagdepensa sa ilang titulo nga maoy ilang ika-12 sa kinatibuk-an.

Balik lantaw sa mga nangagi, si Cortes igo lamang nakabuhi og tam-is nga pahiyom.

Nanghinaut si Cortes nga magpadayon ang ilang ratsada ilabi na kay nagtinguha sila nga maka-’grandslam’ sa sunod nga season. (BANAT NEWS)