Lancers mi-KO sa Webmasters aron pagsakmit ika-12 nga CESAFI title

Si Rey Anthony Suerte maoy nahimong bida sa tanang bida sa dihang gipatukay-ang sa University of the Visayas (UV) Green Lancers ang University of Cebu (UC) Webmasters, 69-56, sa knockout Game 3 sa ilang finals series aron sa malampuson nilang pagdepensa sa ilang trono sa Cebu Schools Athletic Foundation, Inc. (CESAFI)  collegiate basketball kagabii diha sa Cebu Coliseum.

Sa dihang nanginahanglan ang Lancers og kahayag, si Suerte maoy midan-ag sa ilang dalan pinaagi sa pagratsada og 20 puntos  human mipasud og walo sa 17 niya ka itsa. Mitapos sab siya uban ang lima ka assists, upat ka rebounds ug tulo ka steals sa dihang gilangkat sa UV ang ika-12 niining titulo sukad nahimugso ang liga 17 ka tuig ang milabay.

Gawas niini, ang Lancers nagmaya sab sa labing una nilang double championship sa labing unang higayon suds a usa ka dekada. Sa miaging semana, ang Baby Lancers mipalayas sa four-time champions Sacred Heart School-Ateneo de Cebu (SHS-AdC) Magis Eagles sa ilang trono aron pagdominar sa juniors division nga way pilde sa 11 ka duwa.

Espesyal kaayo ang maong kadaogan sa Lancers kay gihilakan kini og maayo sa ilang coach nga si Gary Cortes.

“Gimingaw naman gud ko og ingon ani nga feelings,” matud pa ni Cortes dala labtik og pakatawa. “Taud-taud nang panahon nga nakahilak ko og ingon ani. Nagsagol ang akong emosyon nga dili ko makasulti kon unsay gibati nako sa pagka karon.”

“Sa tinuoray lang, worried kaayo ko nga tingalig mapilde mi aning duwaa. Mao nang pasalamat lang ko sa akong mga players nga mi-respond sila sa gihimo namong adjustments labi na sa defense. Dayeg kaayo ko nila sa ilang kaisog ug determinasyon nga kab-oton ang among goal nga maka back-to-back championships mi,” matud pa ni Cortes nga milabni sa ikaduha niyang korona sud sa tulo pa lamang niya ka season sa Lancers.

Si Jan Monic Soliva mihipos og 10 puntos uban ang tulo ka rebounds, samtang sila si Liberian import Bassieru Sackor ug Jerome Napao mitali og otso puntos matag usa apan milangkat og 22 sa 38 ka rebounds sa Lancers.

Wala sab magpaalkansi sila si Josue Segumpan ug Tristan Albina nga nagkumboya og 15 puntos alang sa Lancers, nga hingpit nga mituldok sa ilang daog human nakalabaw og 14 puntos, 67-53, sa nahibilin nga 3:18 sa duwa.

Si Justin Dacalos mipatuasik og 23 puntos apan daw sa napagngan og kahayag ang Webmasters gumikan kay ang ilang Cameroonian import nga si Frederick Elombi nahimong usa ka estatuwa sa opensa.

Nabokya si Elombi sud sa nag-unang tulo ka kuwarter ug naka-iskor lamang human nakapasud og free throw sa nahibilin nga 8:28 duwa. Mitapos lamang siya og tres puntos nga usa sa mga hinungdan sa pagkatikyaob sa Webmasters.