McCollum gisuspenso

CEBU, Philippines — Ang NBA mipahamtang  og usa ka duwa nga suspensiyon ngadto ni Portland guard CJ McCollum gumikan sa pagbiya niini sa ilang bench sa dihang dunay kagubot nga miulbo.

Si McCollum  mitikang sud sa korte atol sa panagbangi tali nilang Caleb Swanigan sa Portland ug Alex Len sa Phoenix sa katapusang kuwarter atol sa  ilang preseason game niadtong Huwebes.

Wala hinooy gikomprontase si McCollum apan ang iyang gibuhat dunay silot ubos sa mga lagda nga gisubay sa liga.

Kini nagpasabot nga si McCollum dili makapakita'g aksiyon sa una nilang duwa karong NBA season diin sulagma kaayo nga ang Suns sab maoy ilang maka-engkuwentro.

Si McCollum nakapalta lamang og upat ka duwa sa miaging duha ka seasons diin siya mi-avarege og career-high 23 puntos matag duwa. — (BANAT NEWS)