Teleperformance sud sa finals, Convergys buhi pa
CEBU, Philippines — Gi-sweep sa Teleperformance All-Stars ang Lexmark Stallions sa ilang best-of-three semis apan munas ginhawa usa silang mikulit og 46-44 nga daog aron pagtikang ngadto sa Elite Classic finals sa Tanduay Athletics CSCC E-Leagues for Basketball Season 13 niadtong Sabado didto sa City Sports Club Cebu gym.
Maghuwat pa hinoon ang All-Stars sa ilang makontra sa kampiyonato gumikan kay ang two-time defending champion Convergys Converters naka-angkon pa og laing kinabuhi human nakasugakod og duha ka overtime aron panimaslan ang Accenture Sharks, 81-75.
Si Rahne Laborte mitikdol og 12 puntos, lima ka rebounds, duha ka assiss ug duha ka steals, samtang si Marcos Jungoy III miamot og 10 puntos, lima ka rebounds ug upat ka assists alang sa Teleperformance.
Sa laing duwa, si Franz Dione Dysam mipabuhagay og 25 puntos uban ang lima ka rebounds , upat ka steals ug tulo ka assists, samtang si Sherwin Emmanuelle Resilla mikadlit og 21 puntos, pito ka rebounds ug unom ka steals aron pagdan-ag sa ilang kampanya nga maka-grandslam.
Sa laing mga duwa, ang Contact Solutions Flying Lemurs ug QBE Generals mipaluhod sa tagsa-tagsa nila ka mga kontra aron pagposte og 1-0 nga bintaha sa best-of-three Evo League semifinals.
Si Jiffy Canaya mihipos og 15 puntos, unom ka rebounds ug tulo ka steals sa dihang gikulating sa Flying Lemurs ang The Results Spartans, 61-43, samtang si Johnrey Girasol mirehistro og 16 puntos, walo ka rebounds ug tulo ka assists sa dihang gipayukbo sa Generals ang Tech Mahindra Tech Mighties, 66-55. — (BANAT NEWS)
- Latest
