LeBron positibo sa bag-ong Cavaliers

CEBU, Philippines — Giisip ni NBA superstar LeBron James nga bag-ong koponan ang Cleveland Cavaliers tungod usab sa dakung kausaban sa iyang team paingun sa 2017-2018 season sa NBA nga buksan karong semanaha.

Ang four-time MVP nagkanayon nga daku siya og salig sa Cavs ug kompiyansa siya nga moabante siya sa ikawalo niyang sunod-sunod nga NBA Finals ug makahimo na sila pagpilde sa karibal nga Golden State Warriors sa finals.

Daghang koponan ang mihimo og pagbag-o sa ilang lineup, apan ang Cavaliers ang adunay labing daghan nga mga bag-ong players sama nila ni ex-MVP Derrick Rose, Jose Calderon, Jae Crowder, Jeff Green, Isaiah Thomas ug Dwyane Wade.

"I think they will bring another championship DNA, championship pedigree," matud pa ni James sa Agence France Presse.

Hinuon bisan pa sa nausab nila nga lineup, si James wa mabalaka kabahin sa team chemistry ilabi na ni Wade kinsa nakauban na niya kaniadto sa paghatag og duha ka NBA titles sa Miami Heat.

Ang Cavs moduwa sa ilang opener karong Miyerkules diin sangkaon nila ang Boston Celtics nga gibitoonan sa kanhi Cavs star guard nga si Kyrie Irving. — (BANAT NEWS)