James na-injury na SAB

CEBU, Philippines — Si four-time MVP LeBron James dili na makapakita’g aksiyon sa katapusang   pre-season game sa Cleveland Cavaliers ug kuwestiyonable kining makaduwa sa ilang NBA season opener batok sa Boston Celtics karong Martes.

Mismo si Cavaliers coach Tyronn Lue ang mikompirma niini.

Si James nimata nga dunay gibatyag nga ngulngol sa iyang tiil human miiskor og 17 puntos sa una niyang duwa sa pre-season diin sila gipilde sa Chicago Bulls, 84-108.

Mideklarar dayon si Lue nga dili niya paapilon si James sa ilang praktis karong adlawa ug dili paduwaon sa sunod nilang duwa batok sa Orlando Magic karon nga season.

Ang 32-anyos nga si James nga maoy nangulo sa Cavs sa labing una niining NBA title sa miaging tuig, wala kaayo makabanat sa ilang training camp ug ingon man sa ilang pre-season games human makahiagum og injury niadtong Septiyembre 27.

Sud sa 14 ka tuig niya sa NBA, si James wala pa makapalta bisan og usa ka season-opener, apan si Lue nagduha-duha pagtubag kun makasalida ba ang ilang alas batok sa Boston sunod semana. (BANAT NEWS)