Lebron wala kaduwa
CEBU, Philippines — Si Cleveland Cavaliers star LeBron James wala makaduwa sa ilang pre-season game batok sa Indiana Pacers kagahapon.
Maayo ang gipakita sa four-time MVP sa ilang praktis niadtong Biyernes, apan tuyo nga wala siya paduwaa aron pagseguro nga hingpit nang naalim ang angol nga iyang gihambin kun ugaling mobalik na siya sa korte.
Na-injured ang walang kiting ni James human natamakan niini ang tiil sa ilang rookie forward nga si Cedi Osman atol sa ilang praktis niadtong Septiyembre 27. Hayag hinuon ang posibilidad nga si James mopakita na’g aksiyon sa sunod nilang duwa batok sa Washington Wizards karong Lunes.
McGrady balik sa Magic
Mibalik na sa poder sa Orlando Magic ang seven-time All-Star nga si Tracy McGrady, apan dili usa ka player kun dili isip special assistant ni Orlando Magic CEO Alex Martins.
Si McGrady nga nakaduwa uban sa Magic gikan sa tuig 2000 hangtod sa 2004, gitahasan nga mohatag og tambag kun ugaling dunay mga kakulian nga sagubangon ang ilang players ug coaches.
Ang 38-anyos nga si McGrady nga bag-o lang gibayaw ngadto sa Basketball Hall of Fame, nakasilbe og 295 ka duwa sa Orlando diin siya mi-average og 28.1 points, 7.0 rebounds, 5.2 assists ug 1.53 steals. Duha siya ka higayon nga nahimong scoring champion ug gipasidunggan nga Most Improved Player niadtong 2001.
Gawas sa Orlando, si McGrady nakataak sab sa Toronto, Houston, New York, Detroit, Atlanta ug San Antonio sa 15 ka season niya sa NBA. Miretiro siya niadtong 2013. (BANAT NEWS)
- Latest