Irving, Hayward misalida dayon
CEBU, Philippines — Nagparamdam dayon sila si Kyrie Irving ug Gordon Hayward isip mga bag-ong sakop sa Boston Celtics.
Si Irving mitali og nuybe puntos, upat ka rebounds ug tulo ka assists, samtang si Gordon midugang og singko puntos ug lima ka rebounds sa dihang gipukan sa Celtics ang Charlotte Hornets, 94-82 sa NBA pre-season games kagahapon didto sa TD Garden sa Boston, Massachusetts.
Nakuha sa Celtics si Irving pinaagi sa usa ka blockbuster trade nga naghatod ni Isaiah Thomas ngadto sa Cleveland Cavaliers, samtang nabira nila si Hayward gikan sa free agent market.
Wala sab magpa-alkansi ang rookie nilang si Jayson Tatum nga mikadlit og nuybe puntos, lima ka rebounds ug upat ka assists alang sa Celtics nga miposa og 11 ka tres.
“We’re building a foundation,” matud pa ni Irving. “We understand that a few other teams that we’re playing against, they’re starting from the bottom as well... For us, we gotta take advantage of games like this.”
Si Dwight Howard, nga gi-trade sa Atlanta ngadto sa Charlotte, mihipos og siyete puntos uban ang 10 ka rebounds, apan nakamugna og unom ka turnovers sa iyang debut sa Hornets.
Sa laing duwa, ang Washington Wizards mipakaging sa Guangzhou Long-Lions, 126-97 sa duha ka exhibition games tali sa NBA ug international teams.
Dugang niini, ang Utah Jazz mo-host sa Sydney Kings sa National Basketball League, ang nag-unang liga sa Australia. Mao kini ang labing unang higayon nga ang usa ka NBL team moduwa didto sa Amerika. (BANAT NEWS)
- Latest