Nietes modepensa batok ArgentinIan
CEBU, Philippines — Giangkon ni three-division world champ Donnie 'Ahas' Nietes nga aduna na lang siyay maihap nga tuig sa dili pa moretiro ug gusto niya nga mapalig-on pa iyang legasiya isip usa sa mga labing ngilngig nga Filipino boxing champion sa kasaysayan.
Si Nietes (40-1, 22KOs) kinsa maoy nagkupot sa record nga 'longest reigning world champion' sa nasud manalipod sa iyang IBF flyweight title batok sa mandatory challenger nga si Juan Carlos Reveco (39-3, 19KOs) sa Argentina sa Nobiyembre.
Ang 35-anyos nga kampiyon nagkanayon nga human sa iyang title defense, pangayuon niya ang usa ka unification fights batok sa ubang kampiyon sa 112 lbs. division.
“I have nothing else to prove, but it has always been my dream to become a unified champion,” matud pa ni Nietes sa usa ka press conference niadtong miaging gabii didto sa Social sa Cebu IT Park. "I think naa na lang ko two to three years sa dili pa mo-retire maong ako gusto makab-ot akong damgo."
"Andam ko bisan kinsa sa 112 pounds. Dili nako kasaka pa kay para nako ang flyweight na akong last nga timbang," dugang pa niya.
Si Nietes ang bugtong Pinoy nga kampiyon sa flyweight division nga gidominaran sa mga Japanese champs sama nila ni Daigo Higa (WBC), Kazuto Ioka (WBA) ug Sho Kimura (WBO).
Sa iyang bahin, ang head trainer ni Nietes nga si Edito Villamor miingon nga di sila manumbaling bisan pa og adto sa Argentina ipahigayun ang sangka sa iyang batos ug ni Reveco tungod kay seguraduon nila nga andam sila. (BANAT NEWS)
- Latest
