MPPH kampiyon sa 1st Friendship Basketball League

CEBU, Philippines — Nagmangtas sila si Jumar Toyugan ug Jay-R Gocotano sa fourth quarter alang sa MPPH nga mipilde sa ACW Warriors aron maangkon ang kampiyonato sa 1st Friendship Basketball League niadtong Domingo sa gabii didto sa Sacred Heart School-old campus gym sa General Maxilom Ave., Cebu City.

Si Toyugan miantog og 19 puntos uban ang upat ka rebounds, samtang 19 puntos sab ang nahimo ni Gocotano, apan milangkat siya og 11 ka rebounds aron pangulohan ang MPPH nga milabaw og  kuwatro puntos sa halftime, 27-23.

Misalida sab og maayo si Jareid Dacayan nga mitikdol og 11 puntos sa maong kadaogan.

Miburot pa ang ilang labaw ngadto sa 12 paghuman sa tulo ka kuwarter, 44-12, apan   takulahaw lang kining mihiyos dihang nag-wild sab si  Jessie  Andales, kinsa mikadlit og 19 puntos uban ang 14 ka rebounds aron pangulohan ang  ACW Troopers

Nakakuha sab siya og suporta gikan ni Marlon Omayao nga mitimang og 11 puntos.

Misikit unta ang ACW Troopers, 52-55, apan napawong ang ilang paglaum nga modaog dihang mikawat og salida sila si Tuyogan ug Gocotano aron inaton og balik ang labaw sa MPPH.

Sila si Toyugan ug Gocotano maoy nangulo sa Mythical Five uban nilang Omayao sa ACW Troopers, Alpoy Manaloto sa MCISCO ug Panares sa Selected Warriors.

Ang liga nga gipasiugdahan ni commissioner Jumar Toyugan, gipaluyohan nilang Crisally Egloria, Tanya Noreen Elumba, Rhea Danica Mosende ug Jude Pangan.

Puntos matag usa

MPPH (73) – Toyugan 19, Gocotano 19, Dacayan 11, Pielago 5, Hablo 4, Almonia 4, Romocha 2, Anglit 2.

ACW Troopers (60) – J. Andales 19, Omayao 11, Villamora 8, Binolirao  7, Soco 5, Wapanio 2, Patiño 2, Lerio 2, Burlaos 2, Padigos 2. (BANAT NEWS)