Newsome mipalagsik sa Meralco Bolts

CEBU, PHilippines — Si Chris Newsome midiga og impresibong mga numero sa katapusan nilang duha ka duwa nga nakatabang sa Meralco Bolts pagsilyo sa topseed sa PBA Governors’ Cup playoffs.

Nasayod  kun  unsa ka importante ang katapusan nilang duha ka duwa, ang 6-foot-2  nga si Newsome miratsada og 21 puntos, 5.5 rebounds, 5.5 assists ug 1.0 steal aron pag-aswat sa Meralco batok  sa GlobalPort ug San Miguel Beermen aron pagdominar sa eliminasyon bitbit ang 9-2 win-loss record.

Ang 2016 PBA Rookie of the Year nanginit niadtong Biyernes diin siya mipabuto og 28 puntos, pito ka rebounds ug lima ka assists aron pangulohan ang Meralco ngadto sa 100-93 nga kadaogan batok sa Batang Pier.

Duha ka adlaw ang milabay, nagmangtas na sab si Newsome diin siya mipasulod og pito sa 10 niya ka itsa aron pagtapos og 14 puntos uban ang unom ka assists ug upat ka rebounds sa dihang ilang gipakuratan ang San Miguel, 104-101.

Gumikan niini, ang 27-anyos nga si Newsome maoy gipasidunggan nga PBA Press Corps Player of the Week. Iyang gipukan silang Mark Barroca ug PJ Simon sa Star ug ingon man silang Raymond Almazan, Maverick Ahanmisi ug Don Trollano sa Rain or Shine. (BANAT NEWS)