Iesieken vs. AC Troopers sa Triple-A Tany Agbay Cup
CEBU, Philippines — Puwerte na gyud nga hayaga ang kahigayonan sa Iesieken nga mokulit og ‘back-to-back’ championship dihang miabante sila sa finals sa Triple-A Tany Agbay Cup Basketball Tournament 2017.
Kini human ang defending champion Iesieken mipalagpot sa Aqua Zardeba, 64-59 sa knockout semis niadtong Domingo diha sa Kimwa gym sa Subangdaku, dakbayan sa Mandaue.
Sila si Loloh Sicad ug Rey Gonzaga parehong mikabya og 13 puntos aron pangulohan ang scoring sa Iesieken nga wala na molingi pa sukad nila mailog og balik ang labaw paghuman sa third period, 42-40. Miposa og pito ka sunod-sunod puntos si Sicad aron bingaton ang labaw ngadto sa 51-45 sa tunga-tungang bahin sa fourth quarter ug didto nagpangamay na ang kadaogan sa Iesieken.
Ang Aqua Zardeba gipangulohan sab nilang Rechel Bamba ug Richard Lawas nganagkumboya’g 28 puntos.
Labangon hinuon og pito ka lawod ang title defense unya sa Iesieken gumikan kay ang ilang harungon mao man ang tang-an nga AC Troopers ubos sa liderato ni PS/Insp. Dondon Coloscos nga midaog sab batok sa Friends/D’Lurics Enterprises ni Dodong Lurica sa iskor nga 61-55 ug miangkon sa katapusang luna sa finals.
Balanse ang opensa sa AC Troopers, kansang kadaogan gipangulohan ni Canjo Echavez nga mipabuhagay og 12 puntos uban ang lima ka rebounds.
Naglisud hinuon ang AC Troopers sa maong duwa diin gibiyaan sila og 12 puntos sa second period, 12-24. Apan kalit lang milabaw ang AC Troopers sa basket ni Lloyd Chavez, 39-38 sa nahibiling 2:10 sa third period. Sa kombinasyon nilang Canjo ug Chavez miburot pa ang labaw sa AC Troopers, 49-38 paingon sa final period.
Gihatagan unta ang Friends/D’Lurics og higayon aron makarekober dihang na-injured si Canjo sa nahibiling 4:49 sa fourth quarter, apan imbes nga moiskor, naguba hinuon ang ilang duwa ug nakahimo pa og daghang turnovers nga nakahatag kanila og danyos.
Si Johnrey Gorgonio maoy nangulo sa Friends/D’Lurics sa iyang 19 puntos ug milangkat og lima ka rebounds, gisundan ni Alexam Amaga nga adunay 11 puntos ug lima ka rebounds.
Ubos sa liderato sa presidente niining si Dandy Tagalog, ang liga gipadagan ni commissioner Geryl Bukiron sa abag ni Orly Mercado.
Puntos matag usa
Unang duwa:
IESIEKEN (64) – Sicad 13, Gonzaga 13, Cuerbo 8, Navarro 7, Quijano 6, Monterde 5, Tagalog 4, Lumen 3, Yares 2, Montalban 2.
AQUA Zardeba (59) – Bamba 16, Lawas 12, Branoco 6, Ecot 6, Ocier 4, Monterroyo 4, Ramirez 3, Pestaño 2, Lugas 2, Manatad 2, Balicog 2.
Ikaduhang duwa:
AC Troopers (61) – Echavez 12, Pacquiao 8, Chavez 8, Englis 8, Baclay 6, Coloscos 4, Buenavista 3, Estremos 3, Oquias 3, Cabahug 2, Limosnero 2.
FRIENDS/D’Lurics (55) – Gorgonio 19, Amaga 11, Mahusay 9, Lurica 6, Gacasan 5, M. Echavez 5. (BANAT NEWS)
- Latest