Webmasters, Cobras mangindahay sa semis
CEBU, Philippines — Ang University of Cebu (UC) Webmasters ug ang Southwestern University (SWU)-Phinma Cobras mosuway pagpabuhi sa ilang kampanya nga makasulod sa semifinals sa ilang pakigsangka batok sa managlahing kontra sa 17th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.
Samtang ang Webmasters gipaabot nga yanong mopayaka sa nagbitay nga Cebu Institute of Technology (CIT-U) Wildcats sa pasiunang duwa sa alas- 5:15 sa hapon, bug-at nga tahas ang pas-anon sa Cobras gumikan kay ilang ikaatbang mao man ang defending champion University of the Visayas (UV) Green Lancers sa main game sa alas-6:45 sa hapon.
Nalansang sa ikaupat nga puwesto ang Webmasters bitbit ang 5-5 record, apan nagginhawa sa ilang liog ang Cobras bitbit ang 4-6 nga baraha. Kay duna na lang sila’y tagurha ka duwa, wala na’y luna sa kapildihan alang sa Webmasters ug Cobras gumikan kay kini nagpasabot nga manamilit na sila sa liga.
Ang Green Lancers padayong naghari sa liderato uban ang 8-1 win-loss card nga naghatag kanila og twice-to-beat incentive sa sunod nga hugna sa torneyo, samtang ang Wildcats hagbay rang natagak kay usa pa’y daog sa 10 ka duwa. (BANAT NEWS)
- Latest