Franz Dysam labing hayag nga bitoon nga E-Leagues
CEBU, Philippines — Si Franz Dionne Dysam sa two-time defending champion Convergys Converters maoy milugwa nga labing hayag sa tanang bitoon human siya mipatuasik og tournament record 68 puntos aron pangulohan ang Team B ngadto sa 124-79 nga demolisyon sa Team A sa All-Star Game sa Tanduay Athletics CSCC E-Leagues for Basketball Season 13 niadtong Sabado diha sa City Sports Club-Cebu gym.
Doble ang pagmaya nga natagamtaman ni Dysam gumikan kay siya sab maoy nanghawod sa 3-point shootout uban sa iyang 14 puntos.
Si Dysam, nga mihipos sab og lima ka steals ug duha ka rebounds, gipaluyohan ni Pol Alfeche sa Wipro Tigers bitbit ang 16 puntos ug upat ka rebounds. Kausa lamang sila nahulga human misutoy ngadto sa sayong 32-20 nga labaw.
Ang Team A nakasikit ngadto lamang sa dos puntos human sa tulo ka kuwarter, 63-65, apan ang Team B mitagak og makalisang nga bomba, 59-16, sa endgame aron pagpulbos sa nagkagidlay nilang kontra.
Sa laing bahin, si Clarence Torre sa Accenture Sharks maoy midaog sa Skills Challenge sud sa oras nga 23.02 segundos, samtang sila si Jhoniel Geraldizo ug Paul Sanchez sa Sykes Pioneers maoy naghari sa 2-ball competition human miposa og 41 puntos. (FREEMAN)
- Latest
