200 ka bodybuilders magtigI sa Mr. and Ms. Phil-Asia
CEBU, Philippines — Kapin sa 200 ka bodybuilders gikan sa siyam ka nasud sa Asya ang nagpanikad nga mopasundayag sa kinulit nilang mga lawas sa Mr. and Ms. Phil-Asia International Bodybuilding Championships 2017 nga gikatakda karong Septiyembre 29 diha sa JSU- PSU Mariners’ Court.
Gipangulohan sa host Philippines, si Dennis Delgado sa organizing Workout Fitness Center mipadayag nga ang uban nga mga partisipante nagagikan sa Korea, India, United Arab Emirates, Malaysia ug Singapore.
Ang mga tang-an nga Pinoy’ng musclemen gikan sa Kuwait ug Dubai moanhi sab dinhi sa Sugbo aron mosuway pagdominar sa kompetisyon nga gipaluyohan sa Germany-based NAC International ubos sa liderato ni Harald Hoyler.
Ang usa ka adlaw nga padak-anay ug pormahay sa lawas naglangkob og 17 ka mga kategoriya.
Kini mao ang Master’s Class 2 & 1, Mr. Novice, Ms. Fitness, Juniors, Physique 2 & 1 (board shorts), Ms. Shape 2 & 1, Mr. Athletic 2 & 1, Ms. Figure, Ms. Physique, Men’s Bodybuilding Short, Medium ug Tall, ug Mixed pairs.
Gipahigayon agi’g pagtambayayong sa NAC Philippines nga gitimon ni Patrick Tan ug sa
Samahan nang mga Barbelista sa Pilipinas uban ni Engr. Jun Tanyag isip presidente, ang Mr. and Ms. Phil-Asia magsilbe sab nga qualifier alang sa Mr. World 2018 dinhi sa Sugbo sa Mayo 13 hangtod sa Hunyo 3 sunod tuig. Mao kini ang labing unang higayon nga ang maong event ipahigayon sa Asya.
Ang mga tiket sa Mr. and Ms. Phil-Asia nagkantidad og P150. Alang sa dugang mga detalye, niadtong mga interesado mahimong motawag sa 255-5531 o 345-2395. (BANAT NEWS)
- Latest
