Hontiveros moduwa sa TNT Katropa?
CEBU, Philippines — Gikataho nga usa ang TNT KaTropa sa mga interesado nga mopatiwas og duwa ni Dondon Hontiveros karon nga season tungod kay moduwa sila sa PBA Governors’ Cup playoffs.
Si Hontiveros nga katapusang niduwa uban sa Alaska Aces, miretiro na sa PBA dili pa dugay, apan mahimo pa niyang tiwason iyang nahibiling mga duwa sa season kun moduwa siya sa usa ka playoff team.
Ang management sa Alaska nagkanayon nga walay problema kon moduwa si Hontiveros human sa serbisyo niini sa Aces nga natagak na sa elimination.
Ang 13-time All-Star nga si Hontiveros usa ka masaligan nga shooter ug ang iyang kasinatian posibleng maoy rason sa pagkuha sa TNT kaniya. Hinuon, wala pa’y opisyal nga tubag ang kadagkoan sa TNT.
Si PBA league operations manager Rickie Santos mihatag lang hangtod sa Lunes sa mga playoff teams aron makakuha og mga free-agents.
Ang TNT mopalig-on sa ilang kupot sa luna sa Final 4 sa ilang sangka batok sa Barangay Ginebra Kings karong alas-5:15 sa hapon didto sa Mall of Asia Arena. Apan sa dili pa ang ilang duwa, magsangka pa ang Blackwater Elite ug Rain or Shine Elasto Painters sa alas-3. (BANAT NEWS)
- Latest
