Sukmagay sa Insular Square karong gabii
CEBU, Philippines — Ang aksiyon sa Cebu Amateur Boxing Revival dad-on karon didto sa Insular Square sa Barangay Tabok dakbayan sa Mandaue diin 12 ka paresan ang magpinaksitay.
Sugdan ang sukmagay karong alas-6 sa gabii.
Sa kids/novice division, sila si Archie Arsolen (37.5 kgs.) ug Charles Darwin Dosdos (44 kgs.) sa Labogon Boxing Club makigbinukbukay nilang Cedrick Benlot sa Cebu City Sports Center ug Jake Tabanao sa Wakee Boxing Club, si Emmanuel Galo sa The 'A' Gym makigtige ni Wyn Cabradilla sa 10,000 BC sa 25.5 kgs., samtang si John Gabriel Tapales sa Wakee BC mohamag ni Alex del Pio sa Phi-Aust Gym sa 42 kgs. class.
Ang mga batos sa Carmen Boxing Club nga sila si Kervin Aresco (48 kgs.) ug Marjun Bato (50 kgs.) moladlad sa ilang abilidad batok nilang Lenbert Cainap sa Big Yellow BC ug John de la Cerna sa Wakee BC, samtang si Yerodge Gura (46 kgs.) sa Big Yellow makig-atbang ni Ken Bellita sa The 'A' Gym ug si William de la Cruz (55.5 kgs.) makigsangka ni Rowel Nucos sa The 'A' Gym sa laing mga away ubos sa school boys/developmental category.
Sa juniors/experienced division, ang gibaid nga mga talento sa Cebu City Sports Center nga sila si Jeffrey Jimenez (46 kgs.) ug Eduardo Jimenez (46 kgs.) makig-engkuwentro nilang John Paul Gabunilas sa 10,000 BC ug Jimpol Dignos sa Phil-Aust Gym.
Mobanat sab sila si Mardy Cardeno sa 10,000 BC batok ni Benny Canete sa The 'A' Gym sa 52 kgs. ug si Patrick Gantuangco sa The 'A' Gym batok ni Marco Pomar sa UV Boxing Team sa 55 kgs. weight class. (BANAT NEWS)
- Latest