Lamac nakaipsot sa Jugan; Polog abante sa finals

CEBU, Philippines — Nagpabiling buhi  ang kampanya sa defending champion Lamac nga madepensaan ang ilang korona sa Inter-Barangay Seniors Category A human sila nakaeskapo batok sa Jugan, 83-82 sa   knockout quarterfinal match nga miabot pa og overtime sa 7th Mayor Teresa 'Nene' P. Alegado Fiesta Basketball Cup didto sa Consolacion.

Kay parehong wala na’y ugma pa nga nagpaabot nila, ang duha ka koponan miwadwad kutob sa ilang mahimo hinungdan sa sikit kaayo nilang duwa gikan sa sinugdanan nga gikalingaw og maayo sa mga nanan-aw nga nagpabilin bisan og lapas na sa tungang gabii.

Ang duha ka free throws ni Ikid Larrobis sa Lamac human gi-foul ni JV Dumadag maoy nakatabla, 74-all sa nahibiling dos segundos sa regulasyon hinungdan sa overtime.

Misamot pa og kahinam ang duwa sa dugang singko minutos gumikan kay nagpadayon man ang mainit nga pinaksitay sa Lamac ug Jugan.

Human si Lamir Ibale nakaiskor atol sa usa ka fastbreak play nga nakapalabaw sa Jugan, 82-81 sa nahibiling 6.4 segundos,  si  Jacob Baguio midala sa papel isip bayani pinaagi sa pagpasulod sa iyang buzzer-beating basket nga maoy nagtukmod sa Lamac ngadto sa himaya.

Si Baguio mihipos og 15 puntos, samtang si Junard Pales mitikdol og 16 puntos alang sa Lamac nga miabante sa semis.

Lisud pa hinuon nga tahas ang sagubangon sa Lamac gumikan kay ilang sangkaon sunod mao man ang twice-to-beat Pulpogan karong Sabado.

Sa laing duwa sa IB Seniors Category A, ang Nangka duna pa’y tsansa nga motikang sa semis human gipalagpot ang Tayud, 88-79.

Si Romar Ponce mipabuto og 29 puntos, samtang sila si Gelmar Ponce ug Paul Iverson Collango nagkumboya’g 30 puntos sa Nangka.

Sa Inter-Barangay Seniors Category B, sila si     Joseph      Bill    Pepito, Junly Padayogdog ug Franie Suson nagkumboya’g 31 puntos sa dihang gipilde sa Polog ang Lanipga, 58-52  aron pag-abante ngadto sa kampiyonato nga dunay twice-to-beat nga bentaha.

Sa uban pang knockout games, ang Nangka mipukan sa Danglag, 88-72  ug ang three-time defending champion Casili mitagak sa  Cabangahan, 64-57  sa SK Juniors Category A, samtang ang Tolotolo midemolis sa Panoypoy, 78-40  ug ang Lamac mipalayas sa Cabangahan, 73-53  sa midget division.

Si Rey Gonzaga mitikdol og 20 puntos ug si Paul Cabillada mihirit og 14 puntos alang sa Casili nga mipahayag sa ilang tsansa nga makakulit og makasaysayanong four-peat. (BANAT NEWS)